屋里烧菜有屋里个派头，配料随便配，烧上海罗宋汤只要捉牢关键点就好：有番茄、番茄酱、糖，其他有啥用啥，乱炖就好。洋山芋、胡萝卜、洋葱、卷心菜；牛肉碰巧呒没了，就用半筋半肉个牛肉丸，黄油也用勿着买，可以用橄榄油代替。

开油锅，洋葱、胡萝卜、洋山芋、番茄侪切成小块，胡萝卜切小一眼；热锅冷油，先放洋葱、胡萝卜、洋山芋煸透，再加番茄、番茄酱、牛肉丸炒一炒，然后放盐、糖、黑胡椒，加适量水。窍门是糖稍微多一眼，中和番茄个酸味。盖好锅盖烧一刻钟左右，最后再放切片红肠、撕好个卷心菜，炖到所有食材软熟入味就好。

迭碗上海罗宋汤还有两个关键点：一是加点黄牌辣酱油，屋里有就直接用；二是用黄油炒面粉勾芡，汤会更浓，可惜我呒没黄油面粉，就算了。一碗香喷喷、甜滋滋、酸咪咪个罗宋汤，配一片面包，跟今朝暖乎乎个冬日老配。

吃饭前突然想起：中式饭店、食堂里经常吃罗宋汤，老早去西餐厅开洋荤，也常常看到乡下浓汤，味道差勿多。就搭电脑里个AI嘎讪胡，问问罗宋汤跟乡下浓汤到底啥关系。

据说，乡下浓汤就是从罗宋汤变过来个。罗宋汤是上世纪20年代来上海个白俄带来个，上海人当年统统叫伊拉“罗宋人”。伊拉辣上海开罗宋饭店，本来想做熟悉个甜菜汤，结果甜菜买勿到，厨师就因地制宜，用番茄、卷心菜、红肠代替，再加炒香个面粉增稠，迭能一来，酸甜浓香、上海人老欢喜个罗宋汤就诞生了。

哪能后来又叫乡下浓汤？AI一本正经整理出一条时间线：上世纪30年代初，上海德大、凯司令等西餐馆，为了迎合本地人，拿迭道汤改名乡下浓汤。一是因为英文名就叫Country Soup，翻译成“乡下浓汤”；二是因为迭种汤厚笃笃，跟中国人平常吃个清汤勿一样。1935年《申报》西餐广告里，第一次出现“乡下浓汤”，还注明是俄式红菜汤改良而来。

还有种讲法，1943年张爱玲辣《天地》杂志《谈吃》一文写道：“霞飞路个罗宋汤被唤作乡下浓汤，番茄个艳红冲淡了流亡贵族个乡愁，倒像弄堂姆妈个手笔。”看得出，到20世纪40年代，乡下浓汤迭个名字已经深入上海弄堂。

我将信将疑，打开手机再问另一只AI，结论完全勿一样：张爱玲确实写过《谈吃》，但根本呒没提到乡下浓汤，建议再去查资料核实……

看来，AI讲个事体，多少还有点疙疙瘩瘩，勿能全信。