血尖、嶭尖、瞁历尖

叶世荪

文/叶世荪

上海闲话里讲到某样物事十分尖锐，往往会用“血尖”“血血尖”或“血力尖”来形容。

1997年出版的《上海方言词典》收入一词：“血力尖”，意思是形容非常尖锐。例如说“铅笔削得血力尖”。上海人也说“血尖”“血血尖”。不过这里的“血”明显是假借字，因为没有故事情节，“尖”和“血”一般是联不到一起的。那么这个“血”假借的是谁呢？

古代形容山势陡峭、峰入云霄，常用“嶭”字。东汉冯衍《显志赋》：“陟九嵕而临嶘嶭兮，听泾渭之波声。顾鸿门而歔欷兮，哀吾孤之早零。”西汉司马相如《上林赋》：“于是乎崇山矗矗，巃嵷崔巍，深林巨木，崭岩参嵳，九嵕嶻嶭。”西晋左思《魏都赋》：“抗旗亭之嶤嶭，侈所覜之博大。”这个“嶭”，上海话就读若尖团音的“血”。《广韵》：“嶭，私列切。”胡文英《吴下方言考》注释“嶘嶭”一词说：“嶘，壁立也；嶭，音雪，尖貌。吴中谓涉险曰‘嶘’，谓尖峰曰‘嶭尖’。”

除了有形物件，人们的言语、目光也可以用犀利、尖锐来形容。古人形容目光不用“山”字头的“嶭尖”，而是用“目”字旁的“瞁历”。《吴下方言考》引注东汉王延寿《王孙赋》“突高匡而曲頞，目睘瞁历而隳离”曰：“目睘，音环，转视貌；瞁历，视

速貌；隳离，盲失貌。言其转视甚速，宜乎能审，今乃隳离如此，故可丑也。吴谚谓眼光俊速者曰‘瞁历尖’。”

时至今日，上海话里的“血力尖”避开了难认的冷僻字，但同时可能也失落了古代汉语言文字原有的一些韵味。

拿蟹钳壳拼蝴蝶，侬会（口+伐）？

陈日旭

文/陈日旭

上海人勿仅会吃，而且吃功好，有句闲话叫：“西风起，蟹脚痒。”大闸蟹是勿少上海人个心头好。最近又到了吃蟹个辰光，菜场、超市、街边小店，到处侪能看到大闸蟹个身影。现在生态环境好了，除脱老牌阳澄湖蟹之外，崇明大闸蟹也来轧闹猛，半斤多一只，看起来居然有点凶狠霸道个气势。我勿由想起五十几年前屋里向买蟹吃蟹个事体。

记得当时曹家渡长宁路口有条小名叫“臭河浜”（因路边有臭水沟，今长宁支路）个弹硌路，里向除脱有菜场，还有各种旧货摊、“小热昏”（一种马路说唱艺术）、马戏表演等等，市井气氛交关浓。深秋季节一到，西北风一刮，迭个地方就是大闸蟹个天下。特别是从下半天开始，一直到黄昏头，菜场收摊了（埃歇辰光菜场只有早市），大闸蟹个摊头摆得铺天盖地，侪是一只只老大个铁丝笼子，里向个蟹要么拼命朝上爬想逃出“围城”，要么“扑落扑落”吐泡泡。买蟹个人看中哪一只，摊主就会快手快脚伸手进笼子里捉出来，用草绳扎起来，等到挑好几只扎成一串，顾客付过铜钿，就可以高高兴兴拎回家，尝鲜去了。

最闹猛个是黄昏头，太阳已经落山，迭个地方仍旧灯火通明。有摊主为了吸引顾客，专门用竹竿挑起一只用三夹板锯出来个大闸蟹模型，同一般人家摆酒席个圆台面差勿多大，两只模型个眼睛还装了两只100瓦个大灯泡，果然生意邪气好。埃歇马路浪向勿大看得到霓虹灯，天黑了一般只有路灯照明，像搿搭介闹猛个地方真个勿多。像阿拉搿种住辣附近个小囡，即便勿买蟹，到迭种地方白相相，也蛮开心嗰。

再讲吃蟹。阿拉屋里吃蟹，主要是等阿爸领了工资，才到蟹市场去转转，看到有价钿合适嗰就买几只。经常听大人讲起“买蟹经”，啥个“九雌十雄”“九月团脐、十月尖脐”之类。买个辰光挑好雌雄，做到心中有数。买回来之后，由姆妈动手，一只只蟹侪边用自来水冲洗，边用刷子刷干净。汏个辰光一勿当心，被蟹夹手或有蟹逃出盆外也是常事。汏清爽以后，再用扎鞋底线拿蟹捆牢，摆进大钢精锅里蒸十分钟左右。蒸个辰光，姆妈会拿姜末、白糖、醋、味精等调料装成一小碟一小碟，摆到每个人面前，等全部摆好，蟹正好出锅。阿爸是一家之主，伊面前少勿脱一杯绍兴黄酒。阿爸吃得高兴了，会讲聊斋故事拨阿拉小囡听，我听得汗毛凛凛。祖母勿吃蟹，但伊会辣旁边出“谜谜子”（谜语），叫阿拉猜：“卖相实在凶，钳牢勿肯松；杀杀呒没血，烧烧满身红。”

另外，记得阿爸吃蟹真“老鬼”（意为经验丰富）。伊耐心好，吃起来笃悠悠，不仅蟹壳吃得清爽，连蟹腿、蟹钳（蟹螯）侪吃得一干二净。伊还会拿蟹钳壳拼成蝴蝶，粘辣墙头浪好几天，老好白相嗰。

天气冷了，杮子红了

沈一珠

文并图/沈一珠

霜降，是秋天里向最后一个节气。过脱迭个节气个十五天，就辣我国历法浪进入冷天了。

所谓霜降，气肃而凝，露结为霜。讲个是，天气一眼眼冷了，气温一勿当心会降到零度以下。碰着迭个辰光，还呒没来得及结成露珠个水蒸气，直接就凝结成霜花了。而随着霜降大地，天地之间，草木枯黄，鸟兽无踪，就是一派萧瑟气象了。

只勿过，大自然从来就是留有余地嗰。所以，就算冷风凄凄，落叶飘零，偏偏有杮子树，只等枯叶落尽，杮子再会艳红。

“林中有丹果，压树一何稠”，杮子就像一只只小灯笼，挂满辣树枝浪。顶结棍个辰光，一棵树浪可以挂二三百只，假使是一片绵延个杮子林，搿是要有多少好看啊？

曾经开部车子，辣盘山路浪向，看到山腰里有孤零零一棵杮子树，树浪还挂辣三两只杮子，辣荒野里，红得弹眼落晴。偏偏看得着，撩勿着。有一个过路爷叔，奋勿顾身下去，兴高采烈采得来，也是因为伊好看呀。

杮子好看，是霜降辰光个好景；伊还好吃，更是霜降辰光个好吃物事。霜降前后再完全成熟个柿子，皮薄，肉鲜洁，营养来得高，吃一只柿子，就能获得一个成人一天当中需要个维生素C个一半，所以有老话讲，“霜降吃杮子，勿会流鼻涕”。

葛末，捧一篮杮子辣此地，祝侬事事如意。

难忘胡萝卜干

周允中

文/周允中

我姆妈是浦东顾路人，我个小姨跟我姆妈感情很深，经常让子女来送土特产。夏天送玉米、南瓜、甜芦粟，冬天送鸡、鸭、鱼、肉、洋山芋。后来伊个儿子参加高考之前住辣阿拉屋里复习，送来个土特产就更是摸老老。

记忆最深个是，每年冬天，小姨总要用面粉袋送来满满一袋胡萝卜干。听说当地盛产胡萝卜，秋收以后，挑选品相好个胡萝卜，汏干净以后用刀一切四，浸过盐水，再放辣太阳下头晒干。最后出来个胡萝卜干看起来晶莹透剔，稍带紫红色。咬起来，咸中带甜有韧劲，味道交关赞。据说过去江南小镇个茶馆里经常有卖腌制胡萝卜干嗰，是一种邪气受欢迎个茶点。

我小辰光有段辰光市面浪物资匮乏，一个冬天，胡萝卜干就是我最好个零食。衣袋里塞几根胡萝卜干，花一角洋钿去附近嘉兴电影院看早早场，一面看电影，一面啃胡萝卜干，实在有点小乐惠。

最难忘个是，去天水路奇芳居茶馆，听扬州评话大师王少堂讲《武松十回》，每次侪听得入迷，连带去个胡萝卜干也忘记脱吃。等到散场一摸衣袋，胡萝卜干一根勿少，足见评话艺术个魅力。

现在，超市里各种零食看得人看花缭乱，搿种晒制胡萝卜干已经看勿见了。只有童年时代个记忆，回想起来还是老捂心嗰。