用开水浸泡干饭，使之变成像粥个稀饭，上海人称为“泡饭”。这个泡饭是最让人印象深刻的上海饮食习惯之一。仔细考察，这种拿干饭煮成稀饭的做法有两种：用开水浸泡或沸水稍许滚一滚，叫泡饭，也叫饭泡粥；加入水后再煮较长时间，叫做汆粥，也叫饭汆粥。

　　饭泡粥的米粒仍旧分明，相对硬实；网络上这样解释泡饭：“江南一带（尤其是上海）的一种常见食物，多用来当早饭。与粥不同，非但全无粥的那种黏糊和缠绵，反而条理清晰。”日式“茶泡饭”和韩式“酱汤泡饭”也都有这种特征。而饭汆粥则米烂黏稠，更像稀饭。

　　还有，假使直接用米煮成粥，上海人就叫其为“米烧粥”，以区别于饭泡粥和饭汆粥。

　　讲起来，泡饭和汆粥也都是有历史的。泡饭原来写作“氵奅饭”。南宋周辉《清波杂志》记载说：“（高宗）向自相州渡大河，荒野中寒甚，烧柴，借半破瓷盂，温汤、氵奅饭茅檐下，与汪伯彦同食”。这里的氵奅饭，就是如今所说的泡饭。《集韵》：“氵奅，披教切，音泡，渍也。”清代光绪时的《黄岩县志》注：“滚水渍物曰氵奅”。

　　汆粥的汆字，则应为“爨”。2015年3月10日《文汇报》刊有褚半农的考证文章，说：“爨是炊、烧之意，爨粥、饭爨粥，就是将饭再烧成粥。”《广韵》：“爨，七乱切”；《周礼·夏官挈壶氏》：“及冬，则以火爨鼎水，而沸之，而沃之。”《左传·宣公十五年》：“敝邑易子而食，析骸而爨”。讲到都是烧煮的意思，可证其说。

　　最近一个长远勿碰头个老同事来访，茄山河辰光看见我房间伊边个橱浪向放仔一只旧个电唱机，突然眼睛发亮，头一扬问我：“迭只就是阿拉老早辰光常桩放唱片一道听个C84个电唱机？”经伊一问，我也来劲了：“对啊，侬还记得搿四十多年前个事啊。”

　　我走过去拿脱压辣上头个物事，打开机盖接上功放机回头问伊：“阿想听听看？”看伊像啥有介是个点头，我试放了一张唱片。老实讲尽管音色呒没现在个音响效果好，勿过听之搿张老唱片个音乐，阿拉两个人侪慢慢交回忆起阿拉伊歇个“邪气厌气”个辰光。

　　一九七三年，正是文化生活邪气单调个辰光，社会浪除脱八只样板戏，电影每年只有几部，歌曲也侪是革命歌曲。伊歇辰光革命歌曲经常要学唱，我个音乐细胞勿灵，听录音要去专业部门，家庭买录音机是勿可能个，辣辣屋里放唱片听听就勿错了。迭能么我跟姐姐商量一道买只电唱机，反正阿拉已经工作，有经济支配权，长辈也勿管。买啥品牌呢？当时市面浪有两种，一种是上海唱片厂生产个206型电唱机，一种是上海录音器材厂生产个C84型四速电唱机。与206型相比，C84更小巧，我就买了C84型。

　　几首红歌反复听，难免听厌，就偶尔有人偷偷拿来几张老唱片放放，像京剧《四郎探母》、沪剧《罗汉钱》、《阿必大》、越剧《西厢记》，还有相声大师侯宝林个经典段子。哎，蛮有味道个，眼前个老同事就是带来旧唱片最多个。

　　第二年个秋天，我倒霉脚趾头骨折休养了两三个月。幸亏有搿只电唱机陪伴，让我打发难熬个日脚。搿个同事经常带老唱片来看我，两个人一道听听唱片，过过瘾头。有一天，阿拉一道听京剧，突然听见有人敲门，我马上关脱机器，盖上报纸，拿起《红旗》杂志装“门面”，叫同事去开门。一位邻居伸头进来讲：“侬脚好点啦？”我点点头，希望伊早点退出去。呒没想到伊反而进来了，还转身关门，然后走到我床前头：“我听到梅兰芳个唱腔了，好听啊！再放一遍听听。”我正想装模作样个辰光，伊拍拍我肩胛说：“侬放心，保证勿扩散。”同事朝我挤眉弄眼，意思是大家一道听，让我继续。

　　“嗯，就是迭只电唱机，侬囥得牢噢。”老同事一声感叹拉回我个思绪。看着一路走来个伊，我动情地说：“时过境迁睹物思人，伊个老邻居早就不在了。搿台唱机就是伊段生活个见证啊。”

　　听到天气预报讲，搿天气温会有36、37摄氏度。天气忒热，勿想做啥事体。不过，饭总归要吃个呀。还算好，从屋里走出去也就是三五分钟路程里就有小超市，小菜、冷饮侪有得卖，趁早浪太阳还勿大结棍，就去跑一埭。

　　前两天电脑坏脱了，重新买了笔记本、存储卡咾啥；又一时头馋痨，买了小核桃肉，想想可能会有快递要来，就想去买一眼冷饮备辣海。结果，从小吃惯个光明牌盐水棒冰、赤豆棒冰、绿豆棒冰咾啥侪呒没，只好买了点东北大板。以前尝过，口感跟光明牌奶油雪糕差勿多。4块半一根，辣辣搿歇辰光，算得上是价廉物美了。

　　早饭吃好呒没多少辰光，快递就开始来了。

　　先是送电脑。开门一看，眼睛一亮，伊阿会上门前稍许捺自家弄清爽了？绿颜色翻领T恤，黑颜色长裤，看上去端端正正一丝不苟。叫伊等一歇歇，伊呒啥表情，手背辣后头，静静交。东北大板交到伊手里辰光，伊人呆了一呆，表情软了一软，接过，讲一声谢谢，就下楼去了。

　　再等一歇是送小核桃个。哦哟，一件灰驳落拓个白衬衫贴了身浪向，人好像是从水里撩出来一样。叫伊等一歇歇，伊还有点叽里咕噜。所以，伊接过东北大板个辰光，一边穷谢，一边有眼勿好意思：刚刚是生怕下面东西畀人家捺走……

　　顶好白相是请来安装电脑个小弟。小弟已经蛮熟了，屋里电脑出问题侪是伊来解决。伊一边做生活，一边吃一杯阿拉自制冰镇饮料。“嗯，味道蛮好，蓝莓汁？”“桑葚汁，自家泡个，稍许放点蜂蜜。侬回去也可以做一眼。”“算了，阿拉过日脚老简单了，平时也就矿泉水，不过，搿倒是比矿泉水好吃交关……”“葛末，再吃一杯？”小弟整理包包刚要走，又坐下：“要末，吃一杯再走？”

　　哈哈，清凉得一天世界。